سکھر حیدر آباد موٹر وے کی تعمیر کے لیے زمین کی منتقلی اور معاوضوں کی ادائیگی میں پیش رفت

سکھر،29اپریل (پی پی آئی) سکھر سے حیدر آباد موٹر وے (ایم 6) کی تعمیر کے سلسلے میں نیشنل ہائی وے اتھارٹی کو زمین کی منتقلی اور زمین مالکان کو معاوضوں کی ادائیگی کے مسائل پر ایک اہم اجلاس منعقد ہوا۔ کمشنر شہید بینظیرآباد ڈویڑن ندیم احمد ابڑو نے اعلان کیا کہ محکمہ روینیو زمین کی منتقلی کے لیے تیار ہے اور نیشنل ہائی وے اتھارٹی اگر چاہے تو فوری طور پر کام کا آغاز کر سکتی ہے۔اجلاس میں نیشنل ہائی وے موٹر وے ایم 6 کے جنرل منیجر زبیر احمد نے بتایا کہ اسلامک ڈیولپمنٹ بنک آذربائیجان نے موٹر وے کی تعمیر کے لیے فنڈز کی فراہمی کا اعلان کیا ہے بشرطیکہ تمام قانونی کارروائیاں مکمل کی جائیں۔ مزید برآں، مٹیاری اور ضلع نوشہروفیروز میں نیب کی جانب سے 945 ملین روپے کی ریکوری حکومت سندھ کے حوالے کر دی گئی ہے۔ڈپٹی کمشنر شہید بینظیر آباد شہریار گل میمن نے بتایا کہ موٹر وے کی تعمیر کے لیے سیکشن 4 جاری ہو چکا ہے اور سیکشن 6 بھی جلد جاری ہوگا، جبکہ 1380 ایکڑ زمین مختص کی گئی ہے۔ ڈپٹی کمشنر نوشہروفیروز ارسلان سلیم نے زمین کے معاوضے کے ریٹس میں اضافہ کرنے کا مطالبہ کیا ہے۔ اجلاس میں مختلف سرکاری عہدیداروں نے شرکت کی۔