ویٹرنری کے عالمی دن پر جامعہ پونچھ میں خصوصی تقریب کا انعقاد

راولاکوٹ/آزادکشمیر،29اپریل (پی پی آئی) جامعہ پونچھ راولاکوٹ کی فیکلٹی آف ویٹرنری اینڈ انیمل سائنسز میں ویٹرنری کے عالمی دن کی مناسبت سے خصوصی تقریب اور آگاہی واک کا اہتمام کیا گیا۔ تقریب میں مختلف مقررین نے خطاب کرتے ہوئے ویٹرنری کے پیشے کی اہمیت اور معاشرے میں جانوروں کی صحت کی حفاظت پر روشنی ڈالی۔تقریب میں مہمان خصوصی پروفیسر ڈاکٹر عبدالرؤف خان نے کہا کہ ویٹرینیرینز کا کردار کثیر الجہتی ہے اور ان کی ذمہ داری صرف جانوروں کے علاج تک محدود نہیں ہے۔ انہوں نے نوجوان طلبہ کو نصیحت کی کہ وہ ویٹرنری کے پیشے کو بطور ذریعہ معاش اختیار کرنے سے متعلق آگاہی فراہم کریں۔ڈین ویٹرنری اینڈ انیمل سائنسز پروفیسر ڈاکٹر امتیاز احمد نے کہا کہ “صحت مند جانور، دولت مند قوم” کے تھیم کے تحت ہمیں اپنے پیشے میں درست رویے اپنانا ضروری ہے۔تقریب کے اختتام پر کیک کاٹا گیا اور طلبہ اور اساتذہ نے آگاہی واک میں شرکت کی۔