صحافت کی آزادی جمہوریت کی بقا کے لیے لازمی ہے: ڈاکٹر خالد مقبول صدیقی

کراچی،3 مئی (پی پی آئی)متحدہ قومی موومنٹ کے چیئرمین ڈاکٹر خالد مقبول صدیقی نے عالمی یوم آزادیِ صحافت کے موقع پر صحافی برادری کو مبارک باد پیش کی۔ انہوں نے کہا کہ صحافت اظہارِ رائے کی آزادی کے بغیر آئین کی بالادستی، جمہوریت کا تحفظ اور اداروں کی مضبوطی ممکن نہیں ہے۔ڈاکٹر خالد مقبول صدیقی نے صحافت کو ریاست کا چوتھا ستون قرار دیا۔ انہوں نے کہا کہ مختلف ادوار میں صحافت پر لگائی جانے والی پابندیوں کے باوجود، اخلاقی و سماجی اقدار کی پابند صحافت نے اپنی اہمیت کو منوایا ہے۔انہوں نے اس بات پر زور دیا کہ صحافیوں کو سچ کی تلاش اور حق کو بیان کرنے پر سلام پیش کیا جانا چاہیے۔ صحافت کے سماجی، سیاسی اور معاشرتی زندگی پر اثرات مرتب ہوتے رہتے ہیں۔ ڈاکٹر خالد مقبول صدیقی نے مزید کہا کہ اس مقدس شعبے کو تجدید کی ضرورت ہے۔ انہوں نے کہا کہ ایم کیو ایم ایک ایسا آزاد معاشرہ تشکیل دینے کی کوشش کر رہی ہے جہاں آزادی اظہار ہو اور صحافیوں کو تحفظ حاصل ہو۔