وزیر لائیو اسٹاک محمد علی ملکانی کادورہ چوہڑ جمالی، ترقیاتی منصوبوں کا جائزہ لیا

سجاول،3 مئی (پی پی آئی)صوبائی وزیر لائیو اسٹاک و فشریز محمد علی ملکانی نے چوہڑ جمالی ٹاؤن کا اچانک دورہ کیا، جہاں انہوں نے ترقیاتی اسکیموں کے جاری کام کا معائنہ کیا۔ ان کے ہمراہ ڈپٹی کمشنر سجاول زاہد حسین رند بھی موجود تھے۔وزیر نے ہدایت کی کہ شہر کی مین ڈبل روڈ، نکاسی آب سسٹم اور رورل گروتھ سنٹر کے تحت جاری واٹر سپلائی اسکیم کے باقی کام جلد مکمل کیا جائے۔ انہوں نے زور دیا کہ فلٹر پلانٹ کا کنکشن بھی جلدی مکمل کیا جائے تاکہ شہریوں کو صاف پانی دستیاب ہو۔محمد علی ملکانی نے جاری منصوبوں کے معیار پر زور دیتے ہوئے کہا کہ ناقص میٹریل کے استعمال پر کوئی سمجھوتہ نہیں ہوگا۔ انہوں نے تاجر رہنماؤں اور معزز شہریوں سے مشاورت کے بعد شہر کی سڑکوں کی تعمیر اور بجلی کے کھمبے لگانے کے لیے تجاوزات ہٹانے کی ہدایت کی۔صوبائی وزیر نے ال ہارون ہوٹل سے جمن چانڈیو کلینک تک نکاسی آب کے نئے نظام کے قیام کے لیے بھی اقدامات کی ہدایت کی تاکہ بارش کے دوران کھڑے پانی کا مسئلہ حل ہو سکے۔ ان کے مطابق، سندھ حکومت عوام کو بنیادی سہولیات فراہم کرنے میں مصروف عمل ہے۔اس موقع پر اسسٹنٹ کمشنر شاہبندر ڈاکٹر زاہد حسین میرانی، لوکل گورنمنٹ، پبلک ہیلتھ انجینئرنگ، حیسکو اور دیگر محکموں کے افسران بھی موجود تھے۔