سلمان ثروتکے شعری مجموعے “خواب رنگ” کی آرٹس کونسل کراچی میں تقریب رونمائی

کراچی،3 مئی (پی پی آئی)آرٹس کونسل آف پاکستان کراچی کے زیر اہتمام معروف شاعر سلمان ثروت کے شعری مجموعے “خواب رنگ” کی تقریب رونمائی حسینہ معین ہال میں منعقد ہوئی۔ تقریب کی صدارت پروفیسر سحر انصاری نے کی جبکہ ڈاکٹر عالیہ امام، فراست رضوی، رخسانہ صبا، فہیم شناس کاظمی، عمیر احمد خان اور خالد معین نے بھی اظہارِ خیال کیا۔ تقریب میں بڑی تعداد میں علمی و ادبی شخصیات نے شرکت کی۔پروفیسر سحر انصاری نے صدارتی خطبہ پیش کرتے ہوئے کہا کہ “خواب رنگ” ایک ایسا شعری مجموعہ ہے جو آپ کو شہر سے جڑا ہوا دکھائی دیتا ہے۔ انہوں نے کہا کہ ٹیکنالوجی کے بڑھتے ہوئے استعمال کے باوجود مصنوعی ذہانت انسان کے دل کی تپش کو پیش نہیں کرسکتی۔ڈاکٹر عالیہ امام نے کہا کہ غزل ہم سب کی محبوبہ ہے اور “خواب رنگ” کا منظر عام پر آنا خوشی کی بات ہے۔ انہوں نے سلمان ثروت کو مبارکباد پیش کی۔فراست رضوی نے کہا کہ شاعری کے شیش محل کی ایک کھڑکی معاشرے کی طرف ضرور ہوتی ہے۔ سلمان ثروت نے اپنی غزل میں آج کی مصنوعی ذہانت کو بیان کیا ہے۔رخسانہ صبا نے اظہارِ خیال کرتے ہوئے کہا کہ “خواب رنگ” کا سفر کرتے کرتے برجستگی کے وہ لمحے بھی سامنے آئے جب خاموشی کے بوجھ تلے دبے سوالات نے بغاوت پر مجبور کیا۔شاعر سلمان ثروت نے تقریب سے خطاب کرتے ہوئے کہا کہ وہ بھرپور حوصلہ افزائی کرنے پر تمام لوگوں کا شکر گزار ہیں۔ انہوں نے کہا کہ ان کا مقصد احساس کی سچائی اور جذبات کے ساتھ لکھنا تھا، اور آج انہیں محسوس ہوتا ہے کہ وہ اپنی بات کہنے میں کامیاب ہوئے۔