بانی پی ٹی آئی عمران خان کی مقبولیت برقرار ہے،کمی نہیں آئی: مسرت جمشید چیمہ

لاہور،4مئی (پی پی آئی)پاکستان تحریک انصاف کی سینئر رہنما مسرت جمشید چیمہ نے ایک بیان میں کہا کہ حکومت عمران خان کو جیل میں رکھ کر اپنے مقاصد حاصل کرنے میں ناکام رہی ہے۔ انہوں نے دعویٰ کیا کہ عمران خان آج بھی ملک کے سب سے مقبول لیڈر ہیں اور عوام ان کے ساتھ ہیں۔چیمہ نے کہا کہ عمران خان کے خلاف بنائے گئے مقدمات بے بنیاد ہیں اور قوم کا متفقہ مطالبہ ہے کہ ان مقدمات کو ختم کیا جائے۔ انہوں نے مزید کہا کہ عمران خان نے قوم کو پہلے ہی اپنے خلاف ہونے والی کارروائیوں سے آگاہ کر دیا تھا۔مسرت جمشید چیمہ نے بتایا کہ عمران خان نے جیل سے قوم کو بھارت کے خلاف متحد ہونے کا پیغام دیا ہے۔ انہوں نے کہا کہ بھارت کی دھمکیوں سے پاکستانی عوام کو مرعوب نہیں کیا جا سکتا۔