کراچی پولیس کیلئے جدید مرکزی تفتیشی سیل کا قیام

کراچی، 6 مئی (پی پی آئی)ایڈیشنل آئی جی کراچی جاوید عالم اوڈھو نے آج ایس پی آفس لیاقت آباد میں ایک جدید سنٹرلائزڈ انویسٹیگیشن سیل (CIC) کا افتتاح کیا۔ اس تقریب میں ڈی آئی جی ویسٹ، ایس ایس پی سینٹرل، ایس پی انویسٹیگیشن اور دیگر سینئر پولیس افسران نے شرکت کی۔یہ تفتیشی سیل جدید طرز پر قائم کیا گیا ہے اور اس میں آئی ٹی لیب، انٹروگیشن روم، کمرۂ گواہان اور کانفرنس روم جیسی اہم سہولیات موجود ہیں۔ اس کا مقصد ویسٹ زون کے تفتیشی افسران کو جدید ٹیکنالوجی سے آراستہ ماحول فراہم کرنا ہے تاکہ تفتیش کے عمل کو مؤثر اور نتیجہ خیز بنایا جا سکے۔پولیس چیف نے تفتیشی و ٹیکنیکل افسران سے ملاقات کی اور مقدمات کی تفتیش میں جدید ٹیکنالوجی کے استعمال کی ہدایات جاری کیں۔ایڈیشنل آئی جی نے ایس پی آفس میں قائم ویمن اینڈ چائلڈ پروٹیکشن سیل سمیت دیگر شعبہ جات کا بھی دورہ کیا۔ انہوں نے متعلقہ حکام کو نظام کو جدید تقاضوں سے ہم آہنگ کرنے کی ہدایات دیں۔