لاڑکانہ میں اسلام آباد تھیٹر گروپ “امن کار” کا انسانی حقوق اور امن کے موضوع پر تھیٹر پیش

کراچی، 7 مئی (پی پی آئی)  شہید محترمہ بینظیر بھٹو میڈیکل یونیورسٹی لاڑکانہ اور یورپی یونین کے تعاون سے، چانڈکا میڈیکل کالج لاڑکانہ میں اسلام آباد کے تھیٹر گروپ “امن کار” نے انسانی حقوق اور امن کے موضوع پر ایک تھیٹر پیش کیا۔ تھیٹر پرفارمنس نے یہ دکھایا کہ کیسے ایک وقت تھا جب لوگ مذہبی امتیاز سے پاک ماحول میں زندگی گزار رہے تھے اور بعد میں سوشل میڈیا کو ہتھیار بنا کر نفرت کے بیج بوئے گئے۔ طلباء   نے اس پرفارمنس کو سراہا اور کہا کہ انہیں معلومات حاصل کرنے کے ساتھ تفریح بھی میسر آئی۔پرفارمنس کے اختتام پر چانڈکا میڈیکل کالج کے پرنسپل پروفیسر ضمیر احمد سومرو اور وائس پرنسپل ڈاکٹر فوزیہ چانڈیو نے “امن کار” تھیٹر کے فنکاروں کو سندھی ثقافتی تحائف پیش کیے۔ پروفیسر ضمیر احمد سومرو نے اس موقع پر بات کرتے ہوئے کہا کہ سندھ امن اور بھائی چارے کی سرزمین ہے۔ انہوں نے انسانی حقوق اور مذہبی ہم آہنگی جیسے موضوعات پر تھیٹر کی اہمیت کو اجاگر کیا اور “امن کار” تھیٹر کے تعاون پر شکریہ ادا کیا۔