سندھ میں 15 جون سے بڑے بازاروں اور سپلائی پوائنٹس پر پلاسٹک بیگز کے خلاف مہم شروع کیجائے گی

کراچی، 11مئی (پی پی آئی)سندھ حکومت نے ماحولیاتی تحفظ کے حوالے سے اہم اقدامات کا اعلان کیا ہے۔ سیکریٹری ماحولیات آغا شاہنواز خان نے پلاسٹک بیگز اور زہریلا دھواں چھوڑنے والی گاڑیوں کے خلاف کریک ڈاؤن کا حکم دیا ہے۔ 15 جون سے بڑے بازاروں اور سپلائی پوائنٹس پر پلاسٹک بیگز کے خلاف سخت کارروائی کا آغاز کیا جائے گا۔ آغا شاہنواز نے واضح کیا کہ صنعتکاروں کو متبادل اختیار کرنے یا قانونی کارروائی کے لیے تیار رہنے کی ہدایت کی گئی ہے۔پلاسٹک بیگز کو زمین کی آلودگی، نالوں کی بندش اور سمندری حیات کی موت کا سبب قرار دیا گیا ہے۔ سیکریٹری نے بتایا کہ وہیکولر ایمیشن کریک ڈاؤن مہم 29 مئی تک جاری رہے گی اور مختلف مقامات پر زہریلا دھواں چھوڑنے والی گاڑیوں کے چالان کیے جا رہے ہیں۔آغا شاہنواز نے زور دیا کہ ماحولیاتی تحفظ کی جنگ ہر پاکستانی کا قومی فرض ہے اور اس میں کامیابی حاصل کر کے ہم آنے والی نسلوں کے لیے بہتر مستقبل یقینی بنا سکتے ہیں۔