گلشن حدید میں سندھ کے29ویں امراض دل یونٹ کا افتتاح

کراچی، 12 مئی (پی پی آئی) سندھ اداراہ برائے امراضِ قلب (ایس آئی سی وی ڈی) نے پیر کو گلشنِ حدید، بن قاسم ٹاؤن، کراچی میں اپنی 29ویں چیسٹ پین یونٹ  کا افتتاح کیا۔ اس اقدام کا مقصد صوبے بھر میں مفت اور زندگی بچانے والی امراضِ قلب کی ایمرجنسی سہولیات کو وسعت دینا ہے۔افتتاحی تقریب میں مہمانِ خصوصی بیرسٹر مرتضیٰ وہاب، میئر کراچی نے ایگزیکٹو ڈائریکٹر ایس آئی سی وی ڈی پروفیسر جاوید اکبر سیال اور سلمان عبداللہ مراد، ڈپٹی میئر کراچی کے ساتھ شرکت کی۔ اس موقع پر ایس آئی سی وی ڈی کے افسران بھی موجود تھے۔میڈیا سے بات چیت کرتے ہوئے بیرسٹر مرتضیٰ وہاب نے کہا کہ یہ چیسٹ پین یونٹ حکومتِ سندھ کا کراچی کے عوام کے لیے ایک تحفہ ہے۔ انہوں نے زور دیا کہ حکومتِ سندھ صحت کے شعبے میں بہتری لانے اور ہر شہری کو معیاری طبی سہولیات فراہم کرنے میں دلچسپی رکھتی ہے۔ پروفیسر جاوید اکبر سیال نے چیسٹ پین یونٹس کے نیٹ ورک کے کردار کو سراہتے ہوئے کہا کہ اس 29ویں یونٹ کے قیام کے ساتھ ہم گلشنِ حدید کے عوام کو عالمی معیار کی ایمرجنسی خدمات فراہم کر رہے ہیں، جو حکومتِ سندھ کی مدد سے مکمل طور پر مفت ہیں۔ انہوں نے مزید بتایا کہ اب تک چیسٹ پین یونٹس میں 17 لاکھ سے زائد مریضوں کا علاج کیا گیا ہے، جن میں ہزاروں ہارٹ اٹیک کے مریض شامل ہیں۔ ان مریضوں کو فوری ایمرجنسی کیئر دی گئی اور ان کی حالت مستحکم ہونے پر پرائمری انجیو پلاسٹی کے لیے مرکزی سہولیات میں منتقل کیا گیا۔گلشنِ حدید کا نیا چیسٹ پین یونٹ جدید تشخیصی سہولیات، ایمرجنسی کیئر، اور تربیت یافتہ عملے سے لیس ہے جو ہارٹ اٹیک سمیت امراضِ قلب کی ایمرجنسی میں خدمات فراہم کرنے کے لیے موجود ہیں۔