سندھ حکومت کی پبلک ہیلتھ انجینئرنگ میں غیر تسلی بخش کارکردگی پر اظہار برہمی

کراچی، 12 مئی (پی پی آئی) معاون خصوصی وزیر اعلیٰ سندھ برائے پبلک ہیلتھ انجینئرنگ و دیہی ترقی، محمد سلیم بلوچ نے پبلک ہیلتھ انجینئرنگ کے ایک اجلاس میں محکمے کی کارکردگی پر عدم اطمینان کا اظہار کیا۔ اجلاس میں سیکریٹری سید اعجاز علی شاہ، ایڈیشنل سیکریٹری محمد بخش جروار، ڈی جیز اور چیف انجینئرز بھی شریک تھے۔اجلاس کے دوران اے ڈی پی اسکیمز، محکمانہ کارکردگی اور گزشتہ میٹنگ کے فیصلوں پر تفصیلی گفتگو ہوئی۔ سلیم بلوچ نے پچھلی میٹنگ میں کیے گئے فیصلوں پر عدم عملدرآمد پر افسوس کا اظہار کیا۔محمد سلیم بلوچ نے کہا کہ افرادی قوت کی کمی کو پورا کرنے کے لیے فوری اقدامات کیے جائیں۔ انہوں نے ملازمین کے پروموشنز اور نئی بھرتیوں کے معاملے کو جلد نمٹانے کی ہدایت دی۔پراجیکٹس پر کارکردگی نہ دکھانے والی کمپنیوں کے خلاف محکمانہ کاروائی کا بھی فیصلہ کیا گیا۔ نامکمل اسکیموں کو فوری مکمل کرنے اور مکمل اسکیموں کا جلد افتتاح کرنے کا عندیہ دیا گیا۔اجلاس میں آر او پلانٹس کی فوری بحالی پر بھی زور دیا گیا۔ لوڈشیڈنگ زدہ علاقوں میں آر او پلانٹس کو سولر سسٹم سے آپریشنل رکھنے کی تجاویز پیش کی گئیں۔سلیم بلوچ نے واضح کیا کہ عوامی مفاد کی کسی بھی اسکیم یا پراجیکٹ میں کوتاہی برداشت نہیں کی جائے گی۔