کمشنر مظفرآباد اور کمانڈر ون اے کے بریگیڈ کا زخمیوں کی عیادت کا دورہ

مظفرآباد، 14 مئی (پی پی آئی) کمشنر مظفرآباد ڈویژن چوہدری گفتار حسین اور کمانڈر ون اے کے بریگیڈ مظفرآباد نے سی ایم ایچ مظفرآباد کا دورہ کیا اور بھارتی جارحیت کا شکار زخمیوں کی عیادت کی۔ ان کے علاج معالجے کی صورتحال کا جائزہ لیا۔ کمانڈر سی ایم ایچ نے بتایا کہ زخمیوں کو ترجیحی بنیادوں پر ممکنہ سہولیات فراہم کی جا رہی ہیں۔ علاج میں کسی قسم کی کمی نہیں کی جائے گی۔ زخمیوں اور ان کے لواحقین نے علاج پر اطمینان کا اظہار کیا۔کمشنر مظفرآباد اور کمانڈر ون اے کے بریگیڈ نے کشمیر کی جدوجہد میں عوامی و فوجی حمایت کا اعادہ کیا۔ حکومت نے نقصانات کے ازالے کے لیے ایک بورڈ تشکیل دیا ہے جو 15 دن میں سفارشات پیش کرے گا۔کمشنر مظفرآباد نے مسجد بلا ل کے شہید کے لواحقین سے ملاقات کی اور شہید کی قربانی پر خراج عقیدت پیش کیا۔ حکومت کی طرف سے شہید کی بیوہ کو دس لاکھ کا چیک دیا گیا۔