پنجاب کونسل آف دی آرٹس راولپنڈی میں بولتے کتبے’ کی تقریب رونمائی

راولپنڈی،15مئی (پی پی آئی)پنجاب کونسل آف دی آرٹس اور پوٹھوہاری ادبی سنگت کلر سیداں کے اشتراک سے معروف ادیب و شاعر عبد الرحمن کاشف کی نظموں پر مبنی کتاب ‘بولتے کتبے’ کی تقریبِ رونمائی منعقد ہوئی۔ تقریب کی صدارت ممتاز ادیب و شاعر قیوم طاہر نے کی جبکہ مہمانِ خصوصی ڈاکٹر فوزیہ سحر اور مہمان اعزاز نصرت یاب نصرت تھے۔تقریب کی نظامت خیرالنساء   خیری نے کی۔ انہوں نے کتاب اور مصنف کے حوالے سے اپنے خیالات کا اظہار کیا۔ دیگر مقررین میں پروفیسر جمال زیدی، عابد حسین جنجوعہ، نعیم اکرم قریشی، زینت عباسی، اور ڈائریکٹر آرٹس کونسل سجاد حسین شامل تھے۔ مقررین نے عبد الرحمن کاشف کی ادبی خدمات اور شخصیت پر روشنی ڈالی۔ شرکاء نے کتاب ‘بولتے کتبے’ کو اردو ادب میں ایک خوش آئند اضافہ قرار دیتے ہوئے مصنف کے اسلوب اور فکری گہرائی کی تعریف کی۔تقریب میں ریڈیو پاکستان، شعبہ تدریس اور جڑواں شہروں کی علمی و ادبی شخصیات نے بھی شرکت کی۔ تقریب کا انعقاد پنجاب آرٹس کونسل میں ایک اہم ادبی واقعہ کے طور پر دیکھا گیا۔