ٹریفک قوانین کی خلاف ورزی پر سخت کارروائی جاری

کراچی، 17مئی (پی پی آئی) وزیراعلیٰ سندھ سید مراد علی شاہ کی ہدایت پر کراچی میں ٹریفک قوانین کی خلاف ورزی کے خلاف بھرپور کریک ڈاؤن جاری ہے، جس کے دوران ایک ہفتے میں ہزاروں گاڑیوں کے خلاف کارروائی کی گئی، جبکہ متعدد ڈرائیورز کو گرفتار بھی کیا گیا ہے۔وزیراعلیٰ سندھ کو پیش کی گئی ٹریفک پولیس کی رپورٹ کے مطابق 9 مئی سے 16 مئی کے دوران 43,852 موٹرسائیکلیں بغیر ہیلمٹ چلانے پر ضبط کی گئیں، جبکہ 3,951 گاڑیوں کو کالے شیشے اور فینسی نمبر پلیٹس استعمال کرنے پر تحویل میں لیا گیا۔رپورٹ میں بتایا گیا کہ 685 ہیوی اور لائٹ گاڑیاں مختلف ٹریفک خلاف ورزیوں پر روکی گئیں، اور 25 گاڑیوں کی ناقص حالت کے باعث ان کی رجسٹریشن منسوخ کرنے کی سفارش کی گئی۔ مزید 663 گاڑیوں کی رجسٹریشن عارضی طور پر معطل کرنے کی تجویز بھی دی گئی۔ٹریفک قوانین کی سنگین خلاف ورزیوں پر 22 چالان درج کیے گئے، جبکہ چنگچی اور موٹرسائیکل رکشوں کے خلاف چلائی گئی خصوصی مہم میں، جو 16 اپریل سے 16 مئی تک جاری رہی، مجموعی طور پر 194 ایف آئی آرز درج کی گئیں۔ان کارروائیوں کے دوران 434 چنگچی و موٹرسائیکل رکشے تحویل میں لیے گئے اور ان کے ڈرائیورز کو گرفتار کیا گیا، جبکہ 25 بغیر رجسٹریشن رکشے بھی ضبط کیے گئے۔ غیرقانونی طور پر ایل پی جی اور سی این جی کٹس لگانے پر 377 گاڑیوں کے خلاف بھی کارروائی عمل میں لائی گئی۔ٹریفک پولیس نے اس دوران 12,183 فائن ٹکٹس جاری کیے، جس سے عوام میں قانون کی پاسداری کا پیغام دینے کی کوشش کی گئی ہے۔ترجمان کے مطابق، وزیراعلیٰ سندھ نے پولیس حکام کو ہدایت جاری کرتے ہوئے کہا ہے کہ “قانون شکنی پر کوئی رعایت نہ دی جائے۔ ٹریفک قوانین آپ کی جان کے تحفظ کے ضامن ہیں۔” انہوں نے عوام سے اپیل کی کہ ہیلمٹ کا استعمال یقینی بنائیں، فینسی نمبر پلیٹس اور کالے شیشوں سے گریز کریں، اور گاڑیوں کی فٹنس و رجسٹریشن کو مکمل رکھیں۔مراد علی شاہ نے مزید کہا کہ شہر میں ہیوی ٹریفک کی رفتار کی حد 30 کلومیٹر فی گھنٹہ مقرر ہے اور اس پر سختی سے عملدرآمد کیا جائے گا۔ بغیر فٹنس یا رجسٹریشن کے گاڑیاں سڑک پر لانے والوں کے خلاف سخت قانونی کارروائی ہوگی۔انہوں نے شہریوں سے اپیل کی کہ وہ ڈرائیونگ کے دوران تمام حفاظتی اصولوں کی پابندی کریں، تاکہ نہ صرف اپنی بلکہ دوسروں کی جانوں کا تحفظ یقینی بنایا جا سکے۔