ٹھٹھہ میں غیر ملکی باشندوں کی سیکیورٹی کے انتظامات کا جائزہ

ٹھٹھہ،18مئی (پی پی آئی)ایس ایس پی ٹھٹہ ڈاکٹر محمد عمران خان نے ضلع ٹھٹہ میں واقع مختلف غیر سی پیک پراجیکٹس کا غیر اعلانیہ دورہ کیا اور وہاں موجود غیر ملکی باشندوں کے لیے کیے گئے سیکیورٹی انتظامات کا تفصیلی جائزہ لیا۔ انہوں نے سیکیورٹی پر تعینات اہلکاروں کو ڈیوٹی کے حوالے سے تفصیلی بریفنگ بھی دی۔ایس ایس پی نے سیکیورٹی اہلکاروں کو وفاقی اور صوبائی حکومت کی جانب سے جاری کردہ سیکیورٹی پروٹوکولز اور آئی جی پی سندھ غلام نبی میمن اور ڈی آئی جی حیدرآباد رینج طارق رزاق دھاریجو کے احکامات کی سختی سے پیروی کرنے کی ہدایات دیں۔ایس ایس پی نے مزید کہا کہ پراجیکٹس پر موجود عملے کو ہدایت دی گئی ہے کہ کسی بھی غیر ملکی باشندے کو سیکیورٹی کے بغیر کہیں بھی جانے کی اجازت نہیں ہوگی۔ سندھ حکومت کے احکامات پر سختی سے عمل کریں اور سیکیورٹی کے حوالے سے تمام ضوابط پورے کریں۔ایس ایس پی نے واضح کیا کہ کسی بھی غیر متعلقہ شخص کو بغیر اجازت پراجیکٹس کے اندر آنے کی اجازت نہیں ہوگی۔ خلاف ورزی کرنے والوں کے خلاف قانونی کارروائی کی جائے گی۔