کراچی کی پانی کی قلت اور کے فور منصوبے پر جماعت اسلامی کا احتجاج

کراچی، 19 مئی (پی پی آئی) جماعت اسلامی کے رہنما سیف الدین ایڈووکیٹ نے کراچی میں پانی کی قلت اور کے فور منصوبے کی تاخیر پر شدید تنقید کی ہے۔ انہوں نے کہا کہ شہر میں پانی کی فراہمی نہ ہونے کے باوجود میئر کراچی مستقبل کے منصوبے بنا رہے ہیں جبکہ موجودہ مسائل کو نظرانداز کیا جا رہا ہے۔سیف الدین ایڈووکیٹ نے کہا کہ کے فور منصوبہ جس کی لاگت پہلے 20 ارب روپے تھی، اب 200 ارب روپے تک پہنچ چکی ہے۔ ایم ڈی واٹر کارپوریشن کے مطابق یہ منصوبہ 2027 تک مکمل ہو گا۔ انہوں نے کہا کہ منصوبہ بندی کے تحت شہر میں پانی کی لائینیں بار بار پھٹتی ہیں، 84 انچ کی لائن 8 مہینے میں 6 بار پھٹی ہے۔انہوں نے میئر کراچی کو پیراشوٹر قرار دیا اور پی پی پی پر تنقید کرتے ہوئے کہا کہ یہ جماعت شہر اور ملک کے لیے کسی جوں کی مانند ہے۔ انہوں نے ایس بی سی اے پر بھی الزام لگایا کہ وہ شہر میں غیر قانونی مافیا کی سرپرست ہے اور کہا کہ ہر ادارہ مافیا بن چکا ہے۔سیف الدین ایڈووکیٹ نے کہا کہ آج کے سٹی کونسل کے اجلاس میں ایک بھی ایجنڈا شہر کے حق میں نہیں۔ پہلا ایجنڈا کے الیکٹرک کو 5000 ایکڑ زمین دینے کا ہے۔ انہوں نے پی پی پی پر آبی دہشتگردی کا الزام لگاتے ہوئے کہا کہ یہ جماعت منصوبہ بندی کے تحت شہر کا امن تباہ کرنا چاہ رہی ہے۔انہوں نے اعلان کیا کہ جماعت اسلامی شہر کے حقوق کے لیے احتجاج کرے گی اور سڑکوں پر نکلے گی۔ انہوں نے کہا کہ اب دمادم مست قلندر ہو گا اور ہم سکون سے نہیں بیٹھیں گے جب تک شہر کے حقوق حاصل نہ کر لیں۔