بین المذاہب ہم آہنگی کا فروغ: گورنر بلوچستان

لاہور، 20 مئی (پی پی آئی) گورنر بلوچستان جعفر خان مندوخیل نے کہا ہے کہ اختلاف رائے کا احترام انسانی معاشرے کا حْسن ہے اور پاکستان میں مذاہب اور اقوام کے تنوع کو ہماری طاقت قرار دیا۔ انہوں نے کہا کہ شہریوں کو مساوی حقوق کی پاسداری کو یقینی بنانا چاہئے۔ یہ بات انہوں نے گورنر ہاؤس کوئٹہ میں بین المذاہب ہم آہنگی کانفرنس کے شرکائسے خطاب کرتے ہوئے کہی۔گورنر مندوخیل نے کہا کہ پاکستان کا آئین تمام شہریوں کو مساوی حقوق اور مذہبی آزادی کی ضمانت دیتا ہے۔ انہوں نے مزید کہا کہ ہم رنگ، مذہب اور نسل کی بنیاد پر کسی سے دوستی یا دشمنی نہیں کرتے۔وفاقی وزیر برائے مذہبی امور سردار محمد یوسف اور پارلیمانی سیکرٹری سنجے کمار سمیت مختلف شعبوں سے تعلق رکھنے والے افراد نے کانفرنس میں شرکت کی۔گورنر نے کہا کہ معاشرے میں رواداری، ہمدردی اور حب الوطنی کو فروغ دینے میں مختلف مذاہب کے افراد کو اپنا کردار ادا کرنا چاہئے۔ انہوں نے اس بات پر زور دیا کہ ملک کو امن و آشتی کا گہوارہ بنانے کے لئے بھائی چارے، اختلاف رائے کا احترام اور مذہبی رواداری کو فروغ دینا ہوگا۔کانفرنس میں گورنر نے بلوچستان میں اقلیتوں کی خدمات کو سراہا اور انہیں ملک و صوبے کی ترقی میں بڑھ چڑھ کر حصہ لینے کی توقع ظاہر کی۔