گورنر سندھ سے وفاقی وزیر کی ملاقات: قومی ورثے کے تحفظ اور ثقافتی تعاون پر گفتگو

کراچی، 21 مئی (پی پی آئی) گورنر سندھ کامران خان ٹیسوری سے وفاقی وزیر برائے قومی ورثہ و ثقافت اورنگزیب خان کھچی نے گورنر ہاؤس میں ملاقات کی۔ ملاقات کے دوران قومی ورثے کے تحفظ، ثقافتی مراکز اور میوزیم کے قیام، اور وفاق سے ثقافتی تعاون بڑھانے پر تفصیلی گفتگو ہوئی۔گورنر سندھ کامران خان ٹیسوری نے کہا کہ سندھ کی ثقافت قومی تشخص کا حصہ ہے۔ اس کے تحفظ کے لیے عملی اقدامات جاری ہیں۔ انہوں نے کہا کہ قومی ورثہ ماضی کی یادگار ہی نہیں، بلکہ مستقبل کی پہچان بھی ہے۔گورنر ہاؤس میں قائداعظم کے دفتر اور زیرِ استعمال اشیاء کو قومی ورثہ سمجھ کر محفوظ کیا گیا ہے۔ گورنر نے کہا کہ گورنر ہاؤس تاریخ، شعور اور عوامی رابطے کا دروازہ ہے، جو سب کے لیے کھلا ہے۔وفاقی وزیر اورنگزیب خان کھچی نے سندھ کی تہذیبی وراثت کو پاکستان کا قیمتی سرمایہ قرار دیا۔ انہوں نے کہا کہ بانی پاکستان کے نظریات، سادگی اور اصول پسندی کو اجاگر کرنا نسلوں کی رہنمائی کے لیے ضروری ہے۔