اسلامی تعاون تنظیم مسئلہ کشمیر کے حل میں کردار ادا کرے: صدر آزاد کشمیر

اسلام آباد، 26 مئی (پی پی آئی) صدر آزاد جموں و کشمیر بیرسٹر سلطان محمود چوہدری نے اسلامی تعاون تنظیم پر زور دیا کہ وہ مسئلہ کشمیر کے حل کے لئے اپنا کردار ادا کرے۔ انہوں نے کہا کہ تنظیم کو چاہیے کہ وہ بھارت پر دباؤ ڈالے اور اقتصادی پابندیاں عائد کرے تاکہ مقبوضہ کشمیر میں جاری مظالم کو روکا جائے۔بیرسٹر سلطان محمود نے کہا کہ مسئلہ کشمیر کشمیری عوام کی مرضی کے مطابق حل ہونا چاہیے۔ انہوں نے بھارت کی جانب سے پہلگام میں فالس فلیگ آپریشن کا ذکر کرتے ہوئے کہا کہ پاکستان نے اس کا موثر جواب دیا۔انہوں نے مزید کہا کہ جنگ کسی مسئلے کا حل نہیں ہوتی اور پاکستان اور بھارت کے درمیان تنازعہ کی بنیادی وجہ مسئلہ کشمیر ہے۔ جنوبی ایشیا میں امن کے لئے اس مسئلے کا حل ضروری ہے۔صدر آزاد کشمیر نے کہا کہ حالیہ پاک بھارت کشیدگی کے دوران امریکہ، سعودی عرب، ترکی اور دیگر ممالک نے جنگ بندی میں اہم کردار ادا کیا۔ انہوں نے عالمی برادری پر زور دیا کہ وہ کشمیریوں کو اقوام متحدہ کی قراردادوں کے مطابق حق خودارادیت دلوانے میں معاونت کرے۔انہوں نے بھارت کی جانب سے آرٹیکل 370 اور 35-A کی منسوخی کا بھی ذکر کیا اور کہا کہ بھارت چاہتا ہے کہ مقبوضہ کشمیر کو دہلی سے چلایا جائے۔ بیرسٹر سلطان محمود نے کہا کہ اسلامی تعاون تنظیم کو اس مسئلے پر اپنا اثر و رسوخ استعمال کرنا چاہیے۔