اوکاڑہ، 29 مئی (پی پی آئی) اوکاڑہ میں ایڈیشنل ڈپٹی کمشنر جنرل حافظ محمد عمر طیب اور ممبر صوبائی اسمبلی میاں محمد منیر کی زیر صدارت ستھرا پنجاب مہم کے تحت ایک اجلاس منعقد ہوا۔ اس اجلاس میں لیگی رہنما چوہدری فیاض ظفر اور سالڈ ویسٹ مینجمنٹ کمپنی کے افسران شریک ہوئے۔
اس موقع پر ساہیوال واٹر اینڈ سینی ٹیشن سروسز کمپنی کے افسران نے عید الاضحی کے موقع پر صاف ستھرا ماحول فراہم کرنے کے لئے تفصیلی بریفنگ دی۔ کمپنی کے افسران نے بتایا کہ ضلع کی تینوں تحصیلوں میں صفائی کے لئے جامع حکمت عملی اپنائی جائے گی۔
تحصیلوں میں مویشی منڈیوں میں صفائی کے انتظامات جاری ہیں۔ عید کے دنوں میں ہر تحصیل کو زونز میں تقسیم کیا جائے گا اور یونین کونسل کی سطح پر کلیکشن پوائنٹس قائم کیے جائیں گے۔
گھر گھر جا کر قربانی کے جانوروں کی آلائشیں اٹھائی جائیں گی۔ کمپنی کی جانب سے آلائش اٹھانے کے لئے شاپر بھی فراہم کیے جائیں گے۔
ایڈیشنل ڈپٹی کمشنر نے عوام کو صاف ماحول فراہم کرنے کے لئے تمام وسائل بروئے کار لانے کی ہدایت کی۔ ممبر صوبائی اسمبلی نے مہم کو وزیراعلیٰ مریم نواز شریف کا منصوبہ قرار دیتے ہوئے عوامی خدمت کے لئے بھرپور کام کرنے پر زور دیا۔