لاہور، 26 اکتوبر 2025 (پی پی آئی) وفاقی حکومت کی جانب سے گندم کی امدادی قیمت 3500 روپے فی من مقرر کرنے کے فیصلے کو قابلِ ستائش قرار دیتے ہوئے ، سابق وفاقی وزیر ہمایوں اختر خان نے اتوار کے روز ایک بیان میں پنجاب حکومت پر زور دیا ہے کہ وہ کاشتکاروں کے لیے وئیر ہائوس تعمیر کرے۔
ان خیالات کا اظہار سابق وفاقی وزیر نے حلقہ این اے-97 کے تفصیلی دورے کے دوران کیا۔ مقامی عمائدین، کاشتکاروں اور نوجوانوں سے گفتگو کرتے ہوئے انہوں نے یہ بھی بتایا کہ حلقے کی ترقی، خاص طور پر سڑکوں کی تعمیر اور صاف پانی کی فراہمی کے لیے صوبائی حکومت سے ایک جامع منصوبہ منظور کروانے کے لیے بھرپور کوششیں جاری ہیں۔
انہوں نے اپنے خطاب میں کہا، “ہماری جدوجہد کسی برادری کے خلاف نہیں بلکہ ان لوگوں کے خلاف ہے جنہوں نے علاقے کا رہنما ہونے کا دعویٰ تو کیا لیکن عملی طور پر یہاں کوئی خدمات فراہم نہیں کیں۔” دورے کے دوران انہوں نے حلقے میں سوگوار خاندانوں کے گھر جا کر تعزیت بھی کی۔