پاکستانی، کشمیری اور کشمیر دوست اراکین پارلیمنٹ سے ہاؤس آف لارڈز میں 17 نومبر کو مسئلہ کشمیر پر بحث میں حصہ لینے کی اپیل

لندن(پی پی آئی)برطانوی پارلیمنٹ کے ایوان بالا ہاؤس آف لارڈز میں مسئلہ کشمیر پر بحث17نومبر کو ہو گی۔ آل پارٹیز کشمیر پارلیمنٹر ی گروپ کے سیکرٹری جنرل لارڈ قربان حسین اس بحث کوسپانسر کریں گے جو کہ ایک گھنٹہ تک جاری رہے گی۔پی پی آئی کے مطابق جموں کشمیر تحریک حق خود ارادیت انٹرنیشنل کے بانی چیئرمین راجہ نجابت حسین نے لارڈ قربان حسین کو مبارک باد دیتے ہوئے دیگر پاکستانی، کشمیری اور کشمیر دوست اراکین پارلیمنٹ سے اپیل کی ہے کہ وہ اس بحث میں حصہ لے کر مقبوضہ کشمیر میں بسنے والے مظلوم کشمیریوں اور بھارت کے مظالم کو بے نقاب کریں تاکہ برطانوی حکومت مغربی اقوام کیساتھ مل کر مقبوضہ کشمیر میں انسانی حقوق کی خلاف ورزیاں بند کروانے میں اپنا کردار ادا کر سکے۔