اورنج لائن میٹرو ٹرین کے کرائے پر نظرثانی، 5مختلف کیٹیگریز میں تقسیم

لاہور(پی پی آئی)بڑھتی ہوئی مہنگائی کے پیش نظر پنجاب حکومت نے اورنج لائن میٹرو ٹرین کے کرائے پر نظرثانی کرتے ہوئے اسے سفر کی طوالت سے مشروط کر دیا۔پی پی آئی کے مطابق اورنج لائن میٹرو ٹرین کا کرایہ 40روپے تھا، خواہ کوئی مسافر ایک اسٹیشن سے سوار ہو کر دوسرے پر اتر جاتا، اسے 40روپے ہی دینے پڑتے تھے۔اب پنجاب حکومت نے کرائے کو 5مختلف کیٹیگریز میں تقسیم کر دیا ہے۔ نئے کرایوں کے مطابق جو مسافر 4کلومیٹر تک سفر کریں گے، ان سے 20روپے کرایہ لیا جائے گا۔ 8کلومیٹر تک سفر کا کرایہ 25روپے، 12کلومیٹر تک سفر کا کرایہ 30روپے اور 16کلومیٹر تک سفر کا کرایہ 35روپے ہو گا۔ پہلے سے آخری سٹیشن تک سفر کا کرایہ پہلے کی طرح 40روپے ہی وصول کیا جائے گا۔