اسلام آ باد(پی پی آ ئی)وفاقی وزیر احسن اقبال نے کہا ہے کہ پاکستان کو تیز ترقی کی راہ پر ڈالنے کیلئے خواتین کا کردار ضروری ہے۔تفصیلات کے مطابق وزارت ترقی و منصوبہ بندی کے زیر اہتمام صنفی بنیاد پر تشدد کیخلاف مہم کے آغاز کے موقع پروفاقی وزیر ترقی و منصوبہ بندی احسن اقبال کا تقریب سے خطاب کرتے ہو ئے کہا کہ پاکستان کے ترقیاتی عمل میں خواتین کا کردار انتہائی کمزور ہے جبکہ پاکستان کی خواتین میں بہت صلاحیت ہے۔انہوں نے کہا کہ ہمارے معاشرے میں خواتین کو پیچھے رکھنے کیلئے مذہب کا استعمال کیا جاتا ہے، یہ ایک انتہائی افسوس ناک بات ہے کیونکہ اسلام نے خواتین کو وراثت اور تعلیم سمیت کئی حقوق دیئے ہیں اور اسلام میں خواتین کو مالی خود مختاری دی گئی ہے۔
انہوں نے مزید کہا کہ 600 کی دہائی کے اوائل میں اسلام کے آغاز میں، پیغمبر اسلام (ص) نے خواتین کے حقوق کو وسعت دی جس میں وراثت، جائیداد اور شادی کے حقوق شامل تھے۔خواتین کے خلاف مظالم کی مذمت کرتے ہوئے، وزیر نے کہا کہ کام کی جگہوں اور تعلیمی اداروں میں خواتین کا مناسب احترام کیا جانا چاہیے، انہیں قومی ترقی میں مزید موثر کردار ادا کرنے کی ترغیب دی جائے۔