کراچی ملیر شمسی کالونی میں ایک گھر کے اندر 4 افراد قتل عورت اور 3 بچیاں شامل،زخمی مرد کی حالت تشویشناک

کراچی (پی پی آئی)کراچی کے علاقے ملیر میں ایک گھر سے 4 افراد کی لاشیں ملی ہیں۔ابتدائی اطلاعات کے مطابق پولیس کو بتایا گیا کہ ملیر کی شمسی کالونی کے ایک گھر میں 5 افراد شدید زخمی ہیں جنہیں طبی امداد کی ضرورت ہے۔پولیس جائے وقعہ پر پہنچی تو دیکھا کہ 4 افراد ہلاک ہوچکے ہیں جب کہ ایک شخص کی حالت انتہائی تشویشناک ہے۔پی پی آئی کے مطابق ایس ایس پی کورنگی ساجد سدوزئی نے کہا ہے کہ جاں بحق ہونے والوں میں ایک خاتون اور3 بچیاں شامل ہیں جب کہ ایک مرد زخمی ہے۔ساجد سدوزئی نے مزید بتایا کہ تمام افراد کو چھریوں کے وار سے قتل کیا گیا ہے۔پولیس کا کہنا ہے کہ واقعے کی نوعیت کے حوالے سے ابھی حتمی طور پر نہیں کہا جاسکتا، ماضی میں اس قسم کے واقعات میں اجتماعی خودکشی کا عنصر بھی پایا گیا تھا۔شواہد اکٹھے کرنے شروع کردئے گئے ہیں اور اطراف کے گھروں کے باہر نصب سی سی ٹی کیمروں کی فوٹیج بھی حاصل کی جارہی ہے کہ واقعے سے قبل مکان میں کون داخل یا باہر نکلا تھا۔۔