پاکستان کی امداد بڑھائی جائے،امریکی رکن کانگریس نے ایوان نمائندگان کو خط لکھ دیا

واشنگٹن(پی پی آئی) امریکی کانگریس کی خاتون رکن شیلا جیکسن نے پاکستان کی امداد بڑھانے کیلئے ایوان نمائندگان میں امورخارجہ کی کمیٹی کوخط لکھا ہے، جس میں کہا گیا ہے کہ پاکستان کو سیلابی صورتحال کا سامنا ہے اس لیے پاکستان کی امداد بڑھائی جائے۔میڈیا ذرا ئع کے مطابق شیلا جیکسن کی جانب سے لکھے گئے خط میں رکن کانگریس نے مطالبہ کیا کہ پاکستان کو سیلاب زدگان کی مدد کیلئے 600 ملین ڈالر دیے جائیں، ساتھ ہی انہوں نے کہا کہ 2005 میں زلزلہ زدگان کیلئے 500 ملین ڈالردیے گئے تھے، اس مرتبہ بھی اسی طرز پر مزید امداد بھیجی جائے، اس امداد سے نہ صرف پاک امریکا تعلقات مزید بہتر ہوں گے، بلکہ اس سے کئی جانیں بچائی جا سکیں گی۔