مقبوضہ جموں و کشمیر کے چھوٹے بڑے شہروں و قصبوں میں بھارت مخالف پوسٹر چسپاں انڈین فوج کی مذمت، معراج چوپان، سجادخان، بلال میر، مظفر بٹ، اشفاق بٹ سے یکجہتی ’کشمیر بنے گا پاکستان اور کشمیریوں کی قربانیاں کبھی رائیگاں نہیں جائیں گی“ کے نعرے درج

جموں /پلوامہ/بانڈی پورہ (پی پی آئی)مقبوضہ جموں و کشمیر کے مختلف چھوٹے بڑے شہروں اور قصبوں میں بھارت مخالف پوسٹر چسپاں کیے گئے ہیں جن میں انڈین فوج کے مظالم کی مذمت کرتے ہوئے ان پانچ بیگناہ کشمیری نوجوانوں معراج الدین چوپان، سجاد احمد خان، بلال احمد میر، مظفر احمد بٹ اور اشفاق احمد بٹ کے ساتھ اظہار یکجہتی کیا گیاہے جنہیں حال ہی میں بدنام زمانہ بھارتی تحقیقاتی ادارے نیشنل انویسٹی گیشن ایجنسی کی عدالت نے عمر قیدکا حکم سنایاہے۔ورثائے شہدائے جموں و کشمیر نامی تنظیم کی طرف سے مقبوضہ جموں و کشمیر کے مختلف چھوٹے بڑے شہروں اور قصبوں میں دیواروں اور کھمبوں پر چسپاں کیے گئے پوسٹروں میں ”کشمیر بنے گا پاکستان اور کشمیریوں کی قربانیاں رائیگاں نہیں جائیں گی“ کے نعرے درج ہیں۔پوسٹروں کے ذریعے حریت رہنماؤں اور کارکنوں سمیت غیر قانونی طور پر نظر بند تمام کشمیریوں کی رہائی کا مطالبہ بھی کیا گیا ہے جبکہ اقوام متحدہ کو یاد دلایا کہ اسے کشمیر کے دیرینہ تنازعہ کے حل کے لیے اپنی متعلقہ قراردادوں پر عمل درآمد کرانا چاہیے۔پوسٹرز میں بھارت کو پیغام دیا گیا کہ کشمیری اس کی ریاستی دہشت گردی کے سامنے کبھی نہیں جھکیں گے اور حق خودارادیت کے لیے اپنی جدوجہد کو مکمل کامیابی تک جاری رکھیں گے۔