محکمہ سماجی بہبود کی اسامیوں میں ایم اے سوشل ورک امیدوارنظرانداز صرف عمرانیات میں ایم اے پاس کو اہل قرار دینے پرسابق طلباسماجی بہبود کا احتجاج ماضی میں دونوں شعبوں میں ایم اے پاس افراد کا تقرر کیا جاتا رہا ہے:انور صدیقی

کراچی (پی پی آئی)شعبہ سماجی بہبود جامعہ کراچی کے سابق طلباء نے حکومتِ سندھ کی جانب سے اسسٹنٹ ڈائریکٹر محکمہ سماجی بہبود کی اسامیوں پر صرف عمرانیات میں ایم اے پاس افراد کو اہل قرار دینے پر شدید رد عمل کا اظہار کرتے ہوئے کہا ہے کہ ان آسامیوں پر سماجی بہبود میں ایم اے پاس کرنے والوں کو نظرانداز کرنا نا انصافی اور زیادتی ہے کیونکہ محکمہ سماجی بہبود میں عرصہ دراز سے عمرانیات اور سماجی بہبود میں ایم اے پاس افراد کا تقرر کیا جاتا رہا ہے مگر اس مرتبہ صرف عمرانیات میں ایم اے پاس افراد سے درخواستیں طلب کی گئیں ہیں جس کا واضح مطلب سماجی بہبود میں ڈگری حاصل کرنے والے طلباء پر روزگار کے دروازے بند کرنا ہے۔انورحسین صدیقی کے مطابق ہم حکومت سندھ سے مطالبہ کرتے ہیں کہ ان آسامیوں کیلئے سماجی بہبود میں ایم اے پاس افراد کو بھی اہل قرار دیا جائے اور اس وقت بھرتی اور تقرری کے عمل کو روکا جائے۔