اسٹیبلشمنٹ نے نااہل، نالائق اور چھاتہ بردار قیادت مسلط کی؛لیاقت بلوچ بوسیدہ نظام اب نہیں چل سکتا، ہر انتخاب مزید تباہی لائے گا، خرابیاں بڑھتی جائیں گی

ہالہ (پی پی آئی) جماعتِ اسلامی کی مجلسِ قائمہ سیاسی قومی امور کے سربراہ لیاقت بلوچ نے منصورہ میں سیاسی انتخابی امور کے مشاورتی اجلاس سے خطاب کرتے ہوئے کہا کہ حکومت اور عمران سیاسی، انتخابی، اقتصادی بحرانوں کے سدھار کے لیے سنجیدہ نہیں۔ مذاکرات کا عمل سراسر دھوکہ ہے اور ایک دوسرے کی مدد کرکے عوام کو بے یقینی کی دلدل میں دھکیلا جارہا ہے۔پی پی آئی کے مطابق لیاقت بلوچ نے کہا کہ اسٹیبلشمنٹ نے نااہل، نالائق اور چھاتہ بردار قیادت مسلط کرکے ریاست، ریاستی اداروں اور جمہوریت و پارلیمنٹ کے ساتھ ظلم و ناانصافی کی۔ انتشار زدہ بوسیدہ نظام اب نہیں چل سکتا۔ شفاف، غیرجانبدارانہ اور متناسب نمائندگی کی بنیاد پر انتخابات جمہور اور جمہوریت کے لیے استحکام لاسکتے ہیں، وگرنہ ہر عام اور ضمنی انتخاب مزید تباہی لائے گا اور نسل در نسل خرابیاں بڑھتی چلی جائیں گی۔