اسلام آ باد/پشاور(پی پی آ ئی) وفاقی وزیر داخلہ رانا ثنااللہ نے لکی مروت پولیس تھانے میں دہشت گردوں کے حملے میں شہید پولیس اہلکاروں کے لواحقین سے افسوس کااظہا کرتے ہو ئے کہا کہ خیبرپختونخوا میں امن و امان کی مسلسل بگڑتی صورتحال پر تشویش ہے، صوبائی پولیس پر دہشت گردوں کے حملوں میں اضافہ نیک شگون نہیں، وفاق خیبرپختونخوا حکومت کو ہر ممکن مدد اور تعاون فراہم کرنے کے لئے تیار ہے۔ اپنے بیان میں وزیر داخلہ را ناثنا اللہ نے تھانہ برگئی پر دہشت گردوں کے حملے کی شدید مذمت کرتے ہوئے پولیس اہلکاروں کی شہادت پر دکھ اور اہل خانہ سے ہمدردی کا اظہار کیا۔انہوں نے کہاکہ سی ایم امن وامان کی صورتحال پر سنجیدگی سے توجہ دیں، اپنے صوبے میں زیادہ اور زمان پارک میں کم وقت گزاریں۔فتنہ کا آلہ کار بننے کے بجائے عوام کے جان ومال کے تحفظ کی ذمہ داریاں پوری کریں۔ حملوں میں اضافہ نیک شگون نہیں، پولیس پر حملے ہو رہے ہیں تو عوام کے تحفظ کا کیا حال ہوگا؟۔عوام کی حفاظت، پولیس کی استعداد میں اضافے کے لئے وفاق کے پی کے حکومت کو ہر ممکن مدد،تعاون فراہم کرنے کے لئے تیار ہے۔