تحریک انصاف کا لاہور میں دفعہ 144 کو الیکشن کمیشن میں چیلنج کرنے کا فیصلہ

اسلام آباد (پی پی آئی)پی ٹی آئی کے چیئرمین عمران خان کا بابراعوان سے ٹیلی فونک رابطہ ہوا ہے، عمران خان نے بابراعوان کو دفعہ 144 کو الیکشن کمیشن میں چیلنج کرنے کی ہدایت کی ہے۔پی پی آئی کے مطابق عمران خان کی ہدایت پر بابراعوان نے پٹیشن تیار کرلی،بابراعوان کچھ دیر بعد الیکشن کمیشن میں پٹیشن دائر کریں گے۔درخواست میں موقف اختیار کیاگیا ہے کہ الیکشن کمیشن دفعہ 144 کے نفاذ کو ختم کرے،لاہور میں تحریک انصاف کی ریلی پر دفعہ 144 کا نفاذ غیرقانونی ہے، دفعہ 144 کا نفاذ سپریم کورٹ فیصلے کے پیرا15 کی خلاف ورزی ہے، درخواست میں مزید کہاگیا ہے کہ پنجاب حکومت پی ایس ایل میچ کو جواز بنا کر ریلی کو روکنے کی کوشش کر رہی ہے،تحریک انصاف کی ریلی اور پی ایس یل کے میچ کا رکاوٹ مختلف ہے،ریلی ساڑھے 5 بجے ختم ہو گی جبکہ پی ایس ایل میچ 7 بجے شروع ہو گا،درخواست میں مزید کہاگیاہے کہ اس سے پہلے کسی شہر میں پی ایس ایل کے دوران دفعہ 144 کا نفاذ نہیں کیاگیا،الیکشن مہم تحریک انصاف کا آئینی حق ہے پنجاب حکومت غیرقانونی طور پر تحریک انصاف کی الیکشن مہم کو روک رہی ہے۔