عدالت ہر معاملے کا سوموٹو نوٹس لیتی ہے،

کرا چی(پی پی آ ئی) پاکستان مسلم لیگ ن کے رہنما اور سابق وزیراعظم شاہد خاقان عباسی نے کہاہے کہ عدالت ہر معاملے کا سوموٹو نوٹس لیتی ہے، لیکن جو کچھ عدالتوں میں ہورہا ہے کوئی اس کا سوموٹو کیوں نہیں لیتا؟۔ کراچی میں میڈیا سے گفتگو کرتے ہوئے سابق وزیر اعظم شا ہد خاقان عبا سی نے کہا ہے کہ ہمارے نظام میں خرابیاں ہیں اور آج عدالت کا نظام ایسا ہے کہ ہر بات پر سوموٹو نوٹس لیتا ہے۔ شادی گھروں کا بھی سوموٹو لیا گیا۔ لوگ سالوں سے عدالتوں کے چکر لگا رہے ہیں، کیا یہاں انصاف نہیں ہونا چاہیے۔ کیا انصاف کی تاخیر ناانصافی نہیں؟ عدالتیں ہر بات کا سوموٹو لیتی ہیں سوائے اس ملک میں انصاف کے نظام کے۔انہوں نے کہا کہ چیف جسٹس سے توقع ہے وہ اپنی ذمہ داری آئین اور قانون کے مطابق پوری کریں گے۔ملک کے حالات مشکل ہیں، انھیں سنبھالنے کی ضرورت ہے اور انتشار کی کیفیت ہو گی تو اس کا اثر ملک پر پڑے گا۔