سندھ پولیس کا جعلی نمبر پلیٹ والی گاڑیوں کے خلاف کریک ڈاؤن کا فیصلہ

کراچی (پی پی آئی)سندھ پولیس نے جعلی نمبر پلیٹ والی گاڑیوں کے خلاف کریک ڈاؤن کا فیصلہ کیا ہے۔پی پی آئی کے مطابق پولیس جلد مہم شروع کرے گی اورجعلی نمبر پلیٹس والی گاڑیوں کو ضبط کیا جائے گا۔اس ضمن میں حیدرآباد، میرپورخاص، سکھر، لاڑکانہ کے ڈی آئی جیز کو مراسلہ بھی جاری کر دیا گیا ہے۔پی پی آئی کے مطابق جعلی نمبر پلیٹس والی گاڑیوں کی بڑی تعداد سڑکوں پر چلنے کا انکشاف ہوا ہے۔پولیس نے ایسی گاڑیوں کو ضبط کرنے کے ساتھ مالکان کے خلاف مقدمات درج کرنے کی ہدایت کی ہے۔پولیس کے مطابق جرائم پیشہ افراد اور دہشت گردوں میں جعلی نمبر پلیٹس اور غیر رجسٹرڈ گاڑیوں کا استعمال ایک عام بات ہے جس کی وجہ سے حکام کے لیے ان کا سراغ لگانا مشکل ہو جاتا ہے۔