پی ڈی ایم نے ڈی چوک میں ریلی کیلئے ضلعی انتظامیہ سے اجازت طلب کرلی

اسلام آباد(پی پی آ ئی) پاکستان ڈیموکریٹک الائنس (پی ڈی ایم) کی جانب سے سپریم کورٹ کے باہرعوامی ریلی کیلئے ضلعی انتظامیہ سے اجازت طلب کر لی گئی۔پی ڈی ایم کی جانب سے ضلعی انتظامیہ کو دی گئی درخواست میں 15 مئی کو ڈی چوک پر عوامی اجتماع کی اجازت طلب کی ہے، درخواست میں ریلی کی اجازت کیساتھ ساتھ سیکورٹی فراہم کرنے کی بھی درخواست کی گئی ہے۔درخواست صدر مسلم لیگ ن طارق فضل چودھری، سیکرٹری جے یو آئی مفتی محمد عبداللہ اور صدر مسلم لیگ ن راولپنڈی ڈویڑن ابرار احمد کی جانب سے دی گئی ہے۔اس حوالے سے صدر مسلم لیگ ن اسلام آباد ڈاکٹر طارق فضل چوہدری کاکہنا ہے کہ احتجاج کے لیے درخواست ضلعی انتظامیہ کو جمع کروا دی گئی ہے، پورے اسلام آباد سے مسلم لیگ ن کے کارکن احتجاج میں بھرپور شرکت کریں گے۔ سپریم کورٹ کے باہر احتجاج کی درخواست میں احتجاج کا لفظ شامل ہے دھرنے کا لفظ شامل نہیں ہے۔دوسری جانب پی ڈی ایم کے سربراہ مولانا فضل الرحمن کی ہدایت پر ملک بھر سے جے یو آئی کے قافلے اسلام آباد کے لیے روانہ ہوگئے ہیں۔