عسکری وسول تنصیبات پر حملے کرنے والے ملک دشمن

اسلام آباد(پی پی آ ئی)وزیر دفاع خواجہ آصف نے کہاہے کہ عسکری وسول تنصیبات پر حملے کرنے والے ملک دشمن ہیں،حملے کرنے والے کے ٹرائل آئین کے مطابق ملٹری کورٹس کے تحت ہوں گے۔وزیر دفاع خواجہ آصف نے عالمی نشریاتی ادارے الجزیرہ سے گفتگوکرتے ہوئے کہاکہ پاکستان میں سیاسی بحران ضرور ہے لیکن بہت جلد اس پر قابو پا لیا جائے گا،9 مئی کوراولپنڈی، میانوالی اور لاہور میں پرتشددواقعات ہوئے،واقعات کے دوران پی ٹی آئی کے مسلح جتھوں نے عسکری تنصیبات پر حملے کئے۔خواجہ آصف کاکہناتھا کہ پاکستان میں اس سے پہلے بھی گرفتاریاں ہوتی رہی ہیں میں بھی گرفتار ہوا تھا،میرا لیڈر، میری سیاسی پارٹی کے کئی لوگ گرفتار ہوئے تھے،ہم نے کبھی تشدد کی سیاست نہیں کی،ہم نے گرفتاریوں پر کبھی عسکری و سول تنصیبات پر حملے نہیں کئے۔وزیر دفاع کاکہناتھا کہ عسکری وسول تنصیبات پر حملے کرنے والے ملک دشمن ہیں،سیاسی اختلافات ضرور لیکن مطلب یہ نہیں کہ سرکاری وعوامی املاک پر حملے کئے جائیں،شرپسندوں نے سوچے سمجھے منصوبے کے تحت عسکری تنصیبات پر حملے کئے، ایسا عمل پاکستان کے خلاف جنگ کے مترادف ہے۔انہوں نے کہاکہ حملے کرنے والے کے ٹرائل آئین کے مطابق ملٹری کورٹس کے تحت ہوں گے،ہم نئی عدالتیں اور نئے قوانین نہیں بنا رہے، پہلے سے قوانین موجود ہیں،ایسے ملزموں کے پاس ہائیکورٹس اور پھر سپریم کورٹ میں اپیل کا حق ہو گا۔ان کا کہناتھا کہ الیکشن اکتوبر میں اپنے وقت پر ہوں گے۔