نواز شریف نے پارٹی رہنماؤں کا اہم اجلاس لندن میں طلب کر لیا

لندن (پی پی آ ئی) پاکستان مسلم لیگ نون کے قائد نواز شریف نے انتخابات سے قبل پاکستان آنے سمیت دیگر سیاسی معاملات پر مشاورت کیلئے پارٹی رہنماؤں کا اہم اجلاس لندن میں طلب کر لیا۔ ذرا ئع کے مطابق مسلم لیگ نون کے پارٹی اجلاس میں وزیراعظم شہباز شریف، وفاقی وزرا اور دیگر رہنما شریک ہوں گے۔ اجلاس میں انتخابات کی ممکنہ تاریخ، موجودہ سیاسی صورت حال سمیت اہم امور پر غور کیا جائے گا۔بتایا گیا ہے کہ اجلاس میں نوازشریف کی انتخابات سے قبل پاکستان آنے یا نہ آنے سے متعلق تفصیلی مشاورت بھی کی جائے گی۔ پی ڈی ایم سمیت اتحادی جماعتوں سے ممکنہ سیٹ ایڈجسٹمنٹ بھی اجلاس کے ایجنڈے کا اہم حصہ ہو گی۔