حکومت اور آئی ایم ایف کے درمیان مذاکرات میں ڈیڈ لاک تاحال برقرار

اسلام آ باد(پی پی آ ئی) پاکستان کیلئے آئی ایم ایف کا ساڑھے 6 ارب ڈالر کا قرض پروگرام ختم ہونے میں صرف 10 روز باقی ہے لیکن ابھی تک مذاکرات میں ڈیڈ لاک دور نہ ہوسکا۔اسٹاف لیول معاہدے پر بھی کوئی پیش رفت بھی نہ ہوسکی۔ذرا ئع کے مطابق پاکستان کی معاشی ٹیم آئی ایم ایف کو بیرونی فنانسنگ کے انتظامات پر بھی قائل نہ کرسکی۔ آئی ایم ایف کے نئے بجٹ پر تحفظات بھی برقرار ہیں۔ وزارت خزانہ نے آئی ایم ایف کے ساتھ پلان بی پر بھی کام شروع کردیا۔مذاکرات کامیاب نہ ہونے کے بعد وزیرخزانہ نے مختلف ممالک کے سفیروں سے بھی ملاقاتیں کیں اور آئی ایم ایف کے ساتھ مذاکرات سے آگاہ کیا۔ وزیرخزانہ کی سفارش پر مختلف ممالک کے سفیر بھی آئی ایم ایف سے بات چیت کریں گے۔دوسری جانب بین الاقوامی جریدے بلوم برگ کے انٹیلی جنس یونٹ نے اپنی رپورٹ میں خطرے کی گھنٹی بجا دی۔رپورٹ میں کہا گیا ہے کہ آئی ایم ایف پروگرام نہ ملا تو پاکستان کیمعاشی حالات مزید بگڑسکتے ہیں۔