مودی حکومت نے غرباء کیلئے زندگی انتہائی مشکل بنا دی ہے،نیشنل کانفرنس

سری نگر/مقبوضہ کشمیر(پی پی آئی)مقبوضہ جموں وکشمیر میں نیشنل کانفرنس نے کشمیریوں کی بنیادی ضروریات نظر انداز کرنے پر بی جے پی کی بھارتی حکومت کو کڑی تنقید کا نشانہ بنایا ہے۔نیشنل کانفرنس کے رہنما اجے کمار سدھوترا نے جموں میں ایک بیان میں مقبوضہ علاقے میں بجلی کی مسلسل بندش اور پانی کی قلت پر شدید تشویش کا اظہار کیا۔انہوں نے کہا کہ مسلسل لوڈشیڈنگ معمول بن چکی ہے جسکی وجہ سے لوگوں کوشدید مسائل کا سامنا ہے۔انہوں نے کہا کہ سمارٹ میٹروں کی وجہ سے لوگوں کو بجلی کے بھاری بل دینے پڑتے ہیں۔ اجے کمار سدھوترا نے کہا کہ مودی حکومت نے غرباء کیلئے زندگی انتہائی مشکل بنا دی ہے۔