ماسٹر پلان کے تحت جوڑیا بازار، کپڑا مارکیٹ میں سڑکوں اور سیوریج کی بحالی کی جائے گی: مرتضیٰ وہاب

کراچی6فروری (پی پی آئی)میئر کراچی مرتضیٰ وہاب نے اعلان کیا ہے کہ جوڑیا بازار اور کپڑا مارکیٹ میں سڑکوں کی تعمیر و بحالی اور سیوریج لائنوں کی تبدیلی کے لیے ماسٹر پلان تیار کیا جا رہا ہے۔ اس منصوبے میں روایتی سڑک سازی کے ساتھ ساتھ اعلیٰ معیار کے پیورز کی سڑکیں شامل کی جائیں گی تاکہ ان اہم تجارتی مراکز میں پائیدار اور مستحکم سڑکوں کی تعمیر کو یقینی بنایا جا سکے۔ انہوں نے مزید کہا کہ اس ماسٹر پلان میں ایک واضح ٹائم لائن شامل ہوگی تاکہ ان ضروری اپ گریڈیشنز کو بروقت مکمل کیا جا سکے۔جمعرات کی صبح جوڑیا بازار اور کپڑا مارکیٹ کے دورے کے دوران، میئر وہاب نے کراچی چیمبر آف کامرس اینڈ انڈسٹری کے صدر محمد جاوید بلوانی اور دیگر اہم اسٹیک ہولڈرز کے ہمراہ ان علاقوں میں ضروری میونسپل خدمات کی فوری فراہمی کی ہدایت دی۔ ان خدمات میں ایک مخصوص فائر ٹینڈر، سیوریج سکشن وہیکل، اور جوڑیا بازار کے دائرہ اختیار میں ایک ٹو ٹرک کی تعیناتی شامل ہے۔ اس کے علاوہ انہوں نے اسٹریٹ لائٹس کی بحالی، سیوریج لائنوں کی دیکھ بھال اور ملبہ و کچرا ہٹانے کے امور کی نگرانی کے لیے فوکل پرسنز کو مقرر کیا، جو سندھ سالڈ ویسٹ مینجمنٹ بورڈ کے تعاون سے کام کریں گے۔اس سلسلے میں ایک کوآرڈینیشن کمیٹی بھی تشکیل دی گئی جس میں کے ایم سی کی جانب سے افضال زیدی، کرم اللہ واسی اور نور حسن جوکھیو کو نامزد کیا گیا، جبکہ جوڑیا بازار سے حارث اگر، عبدالقادر نورانی اور سلیم لالہ جبکہ کپڑا مارکیٹ سے ثاقب گڈ لک اور شیخ عالم کو نامزد کیا گیا۔اس موقع پر سابق صدرکے سی سی آئی محمد ادریس، سابق سینئر نائب صدور ابراہیم کوسمبی، ثاقب گڈ لک اور توصیف احمد، سابق نائب صدر حارث اگر، مینجنگ کمیٹی کے اراکین عارف لاکھانی اور حنیف پوچی، سابق مینجنگ کمیٹی ممبران آصف حاجی کریم اور وسیم الرحمان، اور جوڑیا بازار اور کپڑا مارکیٹ کے نمائندے بھی موجود تھے۔میری ویدر ٹاور پر جاری سیوریج/بارش کے پانی کے نالے کی تعمیر کے حوالے سے تاجروں کے تحفظات پرمیئر نے یقین دہانی کرائی کہ یہ ترقیاتی کام رمضان المبارک سے قبل مکمل کر لیا جائے گا۔ مزید برآں، جوڑیا بازار اور کپڑا مارکیٹ کی تمام سڑکوں کی مرمت کا کام بھی رمضان سے قبل مکمل کر لیا جائے گا۔ کاروباری سرگرمیوں میں کم سے کم خلل ڈالنے کے لیے تمام بحالی کے کام بشمول سیوریج لائنوں کی مرمت، ملبے کی صفائی، اور کچرے کی منتقلی، آدھی رات کے بعد انجام دیے جائیں گے تاکہ دن کے وقت کاروباری سرگرمیاں متاثر نہ ہوں۔بمبئی بازار میں مکمل طور پر بلاک سیوریج لائن اور صالح محمد اسٹریٹ کی خستہ حالی کے حوالے سے مخصوص شکایات کا جواب دیتے ہوئے میئر نے فوری کارروائی کا وعدہ کیا جس میں بند سیوریج لائن کی تبدیلی اور صالح محمد اسٹریٹ کی بحالی شامل ہے تاکہ مقامی کاروباری برادری کو درپیش مشکلات کو کم کیا جا سکے۔علاقے میں پارکنگ کی سہولیات کو بہتر بنانے کے لیے میئر نے بولٹن مارکیٹ بلڈنگ میں ایک ریمپ کی تعمیر کی تصدیق کی جس کی بدولت 300 گاڑیوں کے لیے جگہ میسر آئے گی۔ کراچی چیمبر کے صدر محمد جاوید بلوانی نے چھوٹے تاجروں اور دکانداروں کے لیے میئر وہاب اور سندھ حکومت کی غیر متزلزل حمایت کو سراہا۔ انہوں نے شہری مسائل کے حل میں میئر کی متحرک کوششوں اور کراچی کے تجارتی علاقوں کو کاروباری سرگرمیوں کے لیے سازگار بنانے میں ان کے عزم کی تعریف کی۔ میئر کی آج جوڑیا بازار میں موجودگی زبیر موتی والا کے اس وعدے کی تکمیل ہے جنہوں نے کے سی سی آئی کی انتخابی مہم کے دوران میئر کراچی کو جوڑیا بازار لانے کا وعدہ کیا تھا۔