گورنرسندھ کی 30 ویں عالمی مشاعر ہ میں بحیثیت مہمان خصوصی شرکت

کراچی، ۹فروری (پی پی آئی)گورنر سندھ کامران خان ٹیسوری نے کہا ہے کہ عالمی مشاعرے بین الاقوامی سطح پر ادب کو فروغ دیتے ہیں، شاعری مختلف زبان، تہذیب اور ثقافتوں کے درمیان ایک پل کی حیثیت رکھتی ہے، شاعری ہمیشہ ظلم کے خلاف اور محبت کے حق میں رہی۔ان خیالات کا اظہار گورنرسندھ نے30ویں عالمی مشاعر ہ میں بحیثیت مہمان خصوصی شرکت کے موقع پر شرکاء سے گفتگو کرتے ہوئے کیا، گورنر سندھ نے اکناف عالم سے آئے شعراء کو شہر قائد میں خوش آمدید کہا، گورنر سندھ نے شاندار اشعار پر شعراء کو داد دیتے ہوئے  اس شاندار محفل سجانے پر منتظمین کو خراج تحسین پیش کیا۔ گورنر سندھ نے کہا کہ مشاعرہ قدیم روایت ہے، جو محبت، اخوت کا پیغام عام کرتا ہے، انہوں نے کہا کہ مشاعرہ محض شعر پڑھنے کا نام نہیں، بلکہ یہ دلوں اور احساسات کو اجاگر کرتا ہے، انہوں نے مزید کہا کہ  مشاعرہ معاشرتی مسائل کی عکاسی کرنے کا موثر ذریعہ بھی ہے۔ کامران خان ٹیسوری نے کہا کہ آج اس محفل میں زبانوں کا فرق مٹ گیا لیکن جذبات کی یکجہتی نمایاں ہے، آج دنیا کو امن اور بھائی چارے کی شدید ضرورت ہے، عالمی مشاعرے ایک پیغام ہے کہ انسانیت کو ترجیح دی جائے، گورنر سندھ نے مزید کہا کہ اس ادبی روایت کو ہمیشہ زندہ رکھیں گے۔