کراچی میں 3 مقامات پر پولیس مقابلے، 2 زخمی ڈاکوؤں سمیت5ملزمان گرفتار

کراچی 19فروری (پی پی آئی) شہرقائد کے تین مختلف مقامات پر پولیس اور ڈاکوؤں کے درمیان مقابلے ہوئے، جن میں دو زخمی ڈاکووں سمیت پانچ ڈاکووں کو گرفتار کرلیا البتہ ان کے ساتھی موقع سے فرار ہو گئے۔ پولیس نے ملزمان سے اسلحہ اور لوٹے گئے سامان برآمد کر لیا ہے۔ کراچی پولیس کے بیان کے مطابق سمن آباد، فیڈرل بی ایریا بلاک 17 باب رحمت مسجد کے قریب عوام نے ایک ڈاکو کو پکڑ کر زخمی حالت میں پولیس کے حوالے کر دیا۔ ڈاکو کا دوسرا ساتھی موقع سے فرار ہو گیا۔ زخمی ڈاکو کو ہسپتال منتقل کر دیا گیا اور مزید تفتیش جاری ہے۔گلبرگ کے علاقے میں عائشہ منزل فلائی اوور کے قریب پولیس اور ڈاکوؤں کے درمیان فائرنگ کا تبادلہ ہوا۔ ایک ڈاکو زخمی حالت میں گرفتار کر لیا گیا۔ ملزم سے ایک پستول اور گولیاں برآمد ہوئیں۔ زخمی کو طبی امداد کے لیے ہسپتال منتقل کیا گیا۔خواجہ اجمیر نگری سیکٹر 5A/2 مین روڈ پر بھی پولیس اور ڈاکوؤں کے مابین مقابلہ ہوا۔ فائرنگ کے نتیجے میں دو ڈاکو گرفتار ہوئے، جن میں سے ایک زخمی تھا۔ پولیس نے ملزمان سے ایک پستول، چار لوٹے گئے موبائل فونز اور ایک موٹر سائیکل برآمد کر لی۔ زخمی ڈاکو کو ہسپتال منتقل کر دیا گیا اور مزید تفتیش جاری ہے۔پولیس حکام نے عوام سے اپیل کی ہے کہ وہ قانون نافذ کرنے والے اداروں کے ساتھ تعاون کریں تا کہ شہر میں امن و امان کو یقینی بنایا جا سکے۔