پاکستانی قوم دہشتگردی کے خلاف جنگ میں پاک فوج کے شانہ بشانہ ہے:جسٹس افتخار محمد چوہدری

اسلام آباد،5مارچ (پی پی آئی)پاکستانی قوم دہشتگردی کے خلاف جنگ میں پاک فوج کے شانہ بشانہ کھڑی ہے۔ جسٹس افتخار محمد چوہدری، صدر پاکستان جسٹس و ڈیموکریٹک پارٹی نے بنوں کینٹ پر دہشتگردوں کے حملے کی شدید الفاظ میں مذمت کی ہے اور 15 معصوم شہریوں کی شہادت پر رنج و دکھ کا اظہار کیا ہے۔ “انہوں نے کہا کہ ماہ رمضان کے بابرکت مہینے میں کوئی مسلمان اس طرح کی حرکت نہیں کر سکتا۔ خارجیوں کا نہ کوئی دین ہے نہ ہی قومیت یا شہریت، جن کا قلع قمع کرنا نہایت ضروری ہے چاہے وہ دنیا کے کسی بھی کونے میں ہوں۔”جسٹس افتخار محمد چوہدری نے سکیورٹی فورسز کو بنوں کینٹ حملہ ناکام بنانے پر اور آپریشن میں 6 خارجیوں کو واصلِ جہنم کرنے پر خراجِ تحسین پیش کیا ہے اور کہا ہے کہ پوری قوم اِس جنگ میں پاک فوج کے شانہ بشانہ کھڑی ہے۔”صدر پاکستان جسٹس و ڈیموکریٹک پارٹی نے کہا ہے کہ وفاقی و صوبائی حکومت شہید شہریوں کے لواحقین کو اکیلا نہ چھوڑیں۔ شہدا پیکج لواحقین کو دیں اور زخمیوں کو بہترین طبی و مالی امداد دیں۔”