تعلیم یافتہ خواتین ملکی ترقی میں فعال کردار ادا کریں:وزیراعظم

اسلام آباد،8مارچ (پی پی آئی)وزیراعظم محمد شہباز شریف نے کہا ہے کہ تعلیم یافتہ خواتین ملکی ترقی میں فعال کردار ادا کریں۔ وہ خواتین کے عالمی دن کے موقع پر اسلام آباد میں ایک تقریب سے خطاب کر رہے تھے۔پریس ریلیز کے مطابق، وزیراعظم نے دیہی علاقوں میں خواتین کے تعمیری کردار کا اعتراف کرتے ہوئے ان کے لیے مزید مواقع فراہم کرنے پر زور دیا۔ انہوں نے کہا کہ خواتین کی مکمل استعدادِ کار کو بروئے کار لاتے ہوئے ان کی صلاحیتوں سے استفادہ کرنا ضروری ہے۔شہباز شریف نے اپنے سابقہ دور حکومت میں بطور وزیراعلیٰ پنجاب خواتین کو خودمختار بنانے کے لیے کیے گئے اقدامات کا ذکر کیا۔ انہوں نے کہا کہ جنوبی پنجاب کے اسکولوں میں خواتین کی نمائندگی یقینی بنانے کے لیے انہیں ماہانہ وظائف دیے گئے۔انہوں نے بتایا کہ 2017-18 میں پنجاب بھر میں اینٹوں کے بھٹوں پر کوئی بچہ مزدوری نہیں کر رہا تھا، جبکہ 90 ہزار بچوں کو اسکولوں میں داخل کرایا گیا۔وزیراعظم نے کہا کہ خواتین کے خلاف تشدد کے حوالے سے پاکستان کا پہلا مرکز مسلم لیگ (ن) کے قائد محمد نواز شریف کے دور میں قائم کیا گیا تھا۔