آئی آر آئی ایس سسٹم میں تکنیکی تبدیلیوں سے تاجروں کو مشکلات، ریٹرن فائلنگ میں تاخیر

کراچی،15مارچ (پی پی آئی)سائٹ ایسوسی ایشن آف انڈسٹری کراچی کے صدر احمد عظیم علوی نے فیڈرل بورڈ آف ریونیو (ایف بی آر) کے آن لائن آئی آر آئی ایس سسٹم میں تبدیلیوں کے باعث تاجروں کو درپیش مسائل پر تشویش کا اظہار کیا ہے۔ ان کا کہنا ہے کہ ان مسائل کے نتیجے میں ٹیکس دہندگان بروقت سیلز ٹیکس ریٹرن فائل کرنے سے قاصر ہیں۔ایسوسی ایشن کے مطابق آئی آر آئی ایس سسٹم میں ایچ ایس کوڈ کے نئے نظام، پیمائش کے یونٹس کے مسترد ہونے اور انیگزچرز اپ لوڈ کرنے میں دشواری جیسے مسائل شامل ہیں۔ ان تبدیلیوں کی وجہ سے ٹیکس دہندگان اپنی ماہانہ سیلز ٹیکس ریٹرن فائل نہیں کر پا رہے۔احمد عظیم علوی نے کہا کہ آٹھ ہندسوں پر مشتمل ایچ ایس کوڈ کے اچانک نفاذ اور دیگر تکنیکی مسائل کے باعث پوری سپلائی چین متاثر ہوئی ہے۔ انہوں نے کہا کہ یہ مسائل ہر ٹیکس دہندگان کو درپیش ہیں اور فوری حل کے متقاضی ہیں۔انہوں نے وزیراعظم شہباز شریف، وفاقی وزیر خزانہ محمد اورنگزیب اور وزیر تجارت جام کمال خان سے مطالبہ کیا کہ وہ اس صورتحال کا نوٹس لیں اور درپیش مشکلات کو دور کرنے کے لیے ہدایات جاری کریں۔احمد عظیم علوی نے سیلز ٹیکس ریٹرن فائل کرنے کی مدت میں کم از کم دو ہفتوں کی توسیع کی درخواست بھی کی تاکہ کاروباری برادری کو درپیش مشکلات کم کی جا سکیں۔