آئندہ نسلوں کو سنوارنے کے لیے ہر ماں کو تعلیم دی جانی چاہیے: وزیراعلیٰ سندھ

کراچی، 11مئی (پی پی آئی)وزیراعلیٰ سندھ سید مراد علی شاہ نے ماؤں کے عالمی دن کے موقع پر جاری کردہ پیغام میں ماں کی عظمت اور کردار پر روشنی ڈالی۔ انہوں نے کہا کہ ماں دنیا کی مخلص ترین ہستی ہے اور بچے کی پہلی درسگاہ اور اولین دوست ہوتی ہے۔وزیراعلیٰ نے مزید کہا کہ ماں اپنی زندگی بچوں کی پرورش اور مستقبل کے لیے وقف کر دیتی ہے۔ ماں کی محبت، قربانی اور دعائیں اولاد کی زندگی میں اہم کردار ادا کرتی ہیں۔انہوں نے کہا کہ ماں کی دعائیں تقدیر بدلنے کی طاقت رکھتی ہیں اور اللہ تعالیٰ نے ماں کے قدموں تلے جنت رکھی ہے۔ وزیراعلیٰ نے اس بات پر زور دیا کہ ماں کی محبت ہی دنیا کی واحد غیر مشروط محبت ہے۔مراد علی شاہ نے کہا کہ تعلیم یافتہ ماں مہذب معاشرے کی تشکیل میں کلیدی کردار ادا کرتی ہے اور آئندہ نسلوں کو سنوارنے کے لیے ہر ماں کو تعلیم دی جانی چاہیے۔