پاکستان اور چین کے درمیان سیاسی جماعتوں کے روابط مزید مضبوط بنانے پر اتفاق

بیجنگ، 20 مئی (پی پی آئی)پاکستان اور چین نے سیاسی جماعتوں کے درمیان ادارہ جاتی روابط کو مزید فروغ دینے پر اتفاق کیا ہے، جس کا مقصد دوطرفہ تعاون کو مزید مستحکم بنانا ہے۔یہ فیصلہ بیجنگ میں نائب وزیر اعظم و وزیر خارجہ سینیٹر محمد اسحاق ڈار اور چینی کمیونسٹ پارٹی کے انٹرنیشنل ڈیپارٹمنٹ کے وزیر لیو جیان چاؤ کے درمیان ملاقات کے دوران کیا گیا۔سوشل میڈیا ایکس پر وزارت خارجہ امور کے بیان کے مطابق، ملاقات میں دونوں رہنماؤں نے اس بات پر زور دیا کہ سیاسی جماعتوں کے درمیان رابطے نہ صرف باہمی سمجھ بوجھ کو فروغ دیں گے بلکہ دونوں ممالک کے دیرینہ تعلقات کو مزید مستحکم بنانے میں مددگار ثابت ہوں گے۔سینیٹر اسحاق ڈار نے پاکستان کی خودمختاری، علاقائی سالمیت اور قومی مفادات پر چین کی مستقل حمایت پر شکریہ ادا کرتے ہوئے کہا کہ چین کا اصولی مؤقف ہمیشہ پاکستان کے لیے حوصلہ افزا رہا ہے۔لیو جیان چاؤ نے کہا کہ چین پاکستان کو اپنی خارجہ پالیسی میں اولین ترجیح دیتا ہے اور دونوں ممالک “ہر موسم کے اسٹریٹجک شراکت دار” اور “آہنی دوست” ہیں۔ انہوں نے دوطرفہ تعلقات کو مزید مضبوط کرنے کے عزم کا اعادہ کیا۔فریقین نے اس بات پر اتفاق کیا کہ سیاسی جماعتوں کے مابین تعاون، دوطرفہ تعلقات کو مزید وسعت دینے اور اسٹریٹجک ہم آہنگی کو مضبوط بنانے میں مدد دے گا۔