مورو واقعہ کی عدالتی تحقیقات کا مطالبہ

کراچی، 21 مئی (پی پی آئی) گرینڈ ڈیموکریٹک الائنس (جی ڈی اے) نے مورو میں احتجاج کے دوران فائرنگ اور سیاسی کارکنوں کی ہلاکت و زخمی ہونے کے واقعے کی شدید مذمت کی ہے۔ بدھ کو جی ڈی اے کے ترجمان کی جانب سے جاری کردہ بیان کے مطابق، الائنس پرامن سیاسی جدوجہد پر یقین رکھتی ہے اور احتجاج کو پرتشدد ہتھکنڈوں سے ناکام بنانے کی سازش کی مذمت کرتی ہے۔ترجمان جی ڈی اے نے کہا کہ مورو واقعے کی عدالتی تحقیقات کرائی جائیں اور ملوث کرداروں کو بے نقاب کر کے ان کے خلاف قانونی کارروائی کی جائے۔ انہوں نے مزید کہا کہ جی ڈی اے کا دریائے سندھ پر نئے کینالز بنانے اور کارپوریٹ فارمنگ کے حوالے سے موقف واضح اور غیر متزلزل ہے۔جی ڈی اے نے سندھ کے عوام کی آواز میں شامل ہو کر سندھ کے خلاف ہر سازش کو رد کرنے کا عزم ظاہر کیا ہے۔ ترجمان نے زور دے کر کہا کہ پرامن سیاسی جدوجہد کو پرتشدد ہتھکنڈوں سے روکنے کی کوششوں کی مذمت ہونی چاہیے۔