کراچی میں بلدیاتی اسکولوں کے اساتذہ کا احتجاج

کراچی، 21 مئی (پی پی آئی)  بلدیاتی اسکولوں کے اساتذہ نے نیو کراچی ٹاؤن آفس میں تنخواہوں کی عدم ادائیگی پر احتجاج کیا۔ مظاہرین کا کہنا تھا کہ انہیں گزشتہ دو ماہ سے تنخواہیں نہیں ملی ہیں، جس کی وجہ سے مالی مشکلات میں اضافہ ہوا ہے۔ اس احتجاج میں مرد و خواتین اساتذہ شامل تھے جو بینرز اور پلے کارڈز کے ساتھ اپنے مطالبات کے حق میں نعرے لگا رہے تھے۔اساتذہ کا کہنا تھا کہ نیو کراچی ٹاؤن کے بلدیاتی اسکولوں میں تعلیمی سہولیات کا فقدان ہے اور تنخواہوں کی عدم ادائیگی ایک مجرمانہ غفلت ہے۔ ان کا کہنا تھا کہ ٹائم اسکیل کی منظوری کے باوجود تنخواہوں میں تاخیر ناقابل برداشت ہے۔چیئرمین نیو کراچی ٹاؤن محمد یوسف، مونسپل کمشنر ایاز حمید اللہ بلوچ اور وائس چیئرمین شعیب بن ظہیر نے اساتذہ سے ملاقات کی اور ان کے مسائل سنے۔ محمد یوسف نے کہا کہ وہ اساتذہ کے مسائل سے آگاہ ہیں اور ان کی بروقت تنخواہوں کی ادائیگی کو اولین ترجیح دیتے ہیں۔ انہوں نے مزید کہا کہ انتظامی بے ضابطگیوں کی تحقیقات جاری ہیں اور اساتذہ کو جلد ان کے حقوق کے مطابق تنخواہیں دی جائیں گی۔ وائس چیئرمین شعیب بن ظہیر نے یقین دلایا کہ اساتذہ کے مسائل حل کرنے کے اقدامات کیے جا رہے ہیں اور جلد ہی تنخواہوں کی ادائیگی کا سلسلہ شروع ہو جائے گا۔احتجاج میں شامل اساتذہ نے انتظامیہ کی یقین دہانی کے بعد احتجاج مؤخر کر دیا، امید ظاہر کی کہ ان کے مالی مسائل جلد حل کیے جائیں گے۔