جھوٹی خبر: عدالت کا 12 افراد کے خلاف مقدمہ درج کرنے کا حکم

 بدین، 23 مئی (پی پی آئی)  بدین کی رہائشی ثمرین میمن کی درخواست پر مقامی عدالت نے 12 افراد کے خلاف مقدمہ درج کرنے کا حکم دیا ہے، جن پر سسر اور دیور کی رہائی کی جھوٹی خبر سوشل میڈیا پر وائرل کرنے کا الزام ہے۔ثمرین میمن نے اپنے سسر حسن میمن اور دیور ارمان میمن پر جنسی زیادتی کا الزام عائد کرتے ہوئے عدالت میں پٹیشن دائر کی تھی۔ ثمرین نے پولیس کی انکوائری پر عدم اعتماد کا اظہار کیا تھا، جس کے بعد عدالت نے دوبارہ انکوائری کا حکم دیا۔عدالتی فیصلے کے بعد، ملزمان اور چند سوشل میڈیا ایکٹیوسٹس نے سسر اور دیور کے باعزت بری ہونے کی جھوٹی خبر سوشل میڈیا پر پھیلائی۔ ثمرین نے عدالت میں درخواست دی کہ یہ خبر جھوٹی ہے اور اسے بلیک میل اور ہراساں کیا جا رہا ہے۔عدالت نے پولیس کو معاملے کی انکوائری کرنے اور بیانات ریکارڈ کرنے کا حکم دیا۔ پولیس کی رپورٹ کے بعد، عدالت نے سابق سسر، دیور اور دیگر 10 افراد کے خلاف پاکستان پینل کوڈ کے سیکشن 500 اور 505 کے تحت مقدمہ درج کرنے کا حکم دیا۔سیشن جج محمد طاہر عباسی نے فیصلے میں لکھا کہ صحافیوں کے لیے ضروری ہے کہ وہ تصدیق کے بعد خبر چلائیں۔ عدالت نے جھوٹی خبروں کو عدالت کے وقار اور عوامی اعتماد کے لیے نقصان دہ قرار دیا۔