انتخابات کیلئے الیکشن کمیشن کا پی پی کی غلامی سے آزاد ہونا ضروری ہے، خرم شیر زمان اگر15 روز میں الیکشن کروائے جاسکتے ہیں تو پولیس نفری کی کمی کا بہانا کس لیے کیا گیا؟ الیکشن کمیشن مسلسل عوام کی فریاد نظرانداز اور عدالتی حکم کی توہین کا مرتکب ہورہا ہے:پی ٹی آئی

کراچی (پی پی آئی)پی ٹی آئی کے سندھ اسمبلی میں پارلیمانی لیڈرخرم شیر زمان نے کہا ہے کہ انتخابات کیلئے الیکشن کمیشن کا پی پی کی غلامی سے آزاد ہونا ضروری ہے۔پی پی آئی کے مطابق خرم شیر زمان نے اپنے بیان میں کہا کہ الیکشن کمیشن مسلسل عوام کی فریاد نظرانداز، عدالتی حکم کی توہین کررہا ہے، 15 روز میں الیکشن کروائے جاسکتے ہیں تو پولیس نفری کا بہانا کس لیے کیا گیا؟خرم شیر زمان نے کہا کہ انتخابات کیلئے الیکشن کمیشن کا پی پی کی غلامی سے آزاد ہونا ضروری ہے، الیکشن کمیشن اس وقت پیپلز پارٹی کی کٹھ پتلی بنا ہوا ہے، جو جماعتیں الیکشن سے بھاگ رہی ہیں بہتر ہے وہ مکمل الیکشن سے بائیکاٹ کردیں۔ پارلیمانی لیڈرخرم شیر زمان کا کہنا تھا کہ سیاسی ایڈمنسٹریٹر کی کارکردگی، خدمات صرف سیاست کو چمکانے پر مرکوز ہے، ایم کیو ایم، پی پی واقف ہیں اس بار مہاجر کارڈ یا بھٹو نہیں بکے گا کیونکہ یہ ضمیر فروش عوام میں جانے کے لائق نہیں رہے۔خرم شیر زمان نے مزید کہا کہ کراچی کے عوام کو اپنے مسائل کے حل کیلئے نمائندوں کی ضرورت ہے۔ الیکشن سے بھاگنے والی مخالف جماعتوں کو مزید بھاگنے نہیں دیا جائے گا۔